Exo 2 | TVK | STEP | E melele nen ak, moletin tei xa nggo vatimol xa mahulong na Livae teteli tetel atou tei xa mistal nggo vatit vatimol nen tak.

Exodus 2

Poten na Mosis

Eksodas 2:1-15

1 E melele nen ak, moletin tei xa nggo vatimol xa mahulong na Livae teteli tetel atou tei xa mistal nggo vatit vatimol nen tak. 2 Atou nan miling tuvava tei nalu xa be malahos. E vengan xa pusi xa tuvava nan bos pupu, xi poe ba misoso ni da aveti tol. 3 E melele xa pusi xa misakras mun vasoso ni, xi po ateli tei xa lapol ni ni hisit vi sav tei xa tepiei. Bus di, bas xole ni koltar tengan oei nava ti vangite. Di, miling tuvava nan da en, e milingi misal e seri Oeisal Nael, e ut xa vi xil xa tepiei lameul en. 4 Di, nine tuvava itilomun be tim, e tunahin xa hisen Meriam iaxa misoh de sotin vuteili tengan vapus ti xa naha istal mi tuneli.

5 E melele nen tak, atuli na suv toto bemei e seri oeisal tengan vaxul. Xi bemei del xat atuli te polien nan xil tengan xil ti liketeh xole. Tavehi, atuli na suv toto ak mile xoteh ateli xa de pe vi xil ma misil atuli tei te polien nan tengan ha vapoe vamei. 6 Melele xa poe mei misa ni mini, xi misaha e pus tuvava ak de vangite e di muis. Xi en sae li en ma biteni bit, “!Aue li, ngan ak xos be nat ngan Hibru tova!”

7 Melele xa tunahin Meriam pusi mak, xi be visali e misisi bit, “?Iem bei tengan nama nasis ate-Isrel tova vamei vatunat ni tuvava ak e rin xa nam?”

8 Ma atuli na suv toto biteni mini bit, “Io li, bos tang.” Misak ni, tunahin ba nggur ninen xati bemei visali. 9 Ma atuli na suv toto biteni mini bit, “Uhur tuvava ak e ha usa sus mini e ti nixalok ven. E melele xa iling sus, inou nihur rati sung ihe navan.” Misak ni ngguri e ba di mitunat ni. 10 Melele xa horamue ak matu e miling sus, ninen nggur rilomun ni ba milingi visal atuli na suv toto tahal Isip. Atuli ak nggur rati be nan e miling hisen be 'Mosis' xa koute teni be 'nalihi rati' vengan xa bit, “Natelihi rati ra oei.”

11 Huram holu mei mitavi, Mosis matu mei be tiramue. E vatei, xi ba tengan vasao ni moletin nan xil e pusi xa mol-Isip xil di lasak purun xil ni polien te xeih xil. Ma di, pus ngan Isip tei xa di bas purun ngan Isrel tei, e Mosis mile kila xa be tuneli tei. 12 Mosis miketeh mikapis e pusi xa moletin ti tapusi. Ma mitamea bas vin ngan Isip ak e dihin ni de suvien. Di, dilomun be tim san. 13 E makoe nen, xi dilomun ba e pus ngan Isrel lu di lubae. Ma misis ngan xa pol misa bit, “?Veneh ma di obas tumali xa xamil vus mube ngan Hibru tang?”

14 E moletin ak biteni ni mini bit, “?Visi iaxa milinguk tengan mei ove suv namem e ti olepis xamem? ?Obit ovas nou mun vaxoni ngan Isip xa otehas vini nanganoh?”

Sepinien nan xil misak ni Mosis ulin mikan e misep tasen ni bit, “Ei, moletin xil lakil vuol ni naha xa natepol ni.” 15 E melele xa suv toto tahal Isip milongeong ni naha xa testal, xi milang ves suse tengan vahas Mosis vamat vaxo en. Ma Mosis milesae be sotin, e ba de tan tahal Midia.

Melele xa Mosis duxoh Midia, pris tei na mol-Midia xil xa hisen Setro, maen Mosis ba de tim san. Melengien vahis mei mitavi, pris ak misa natnahin mini xa hisen be Siporah. Xi miling tuvava tei nalu e Mosis miling hisen be 'Kersom' xa koute teni be 'ngan halesav' vengan xa bit, “Inou nabe ngan halesav e kantri ak.” Ma Mosis da kat visal xil e di milaxat sipsip sae xil duxoh huram hanutap lu (40).